সানতাড় কোআঃ লাকচার চেৎ লেকারে আদ কানা ?

 Santali lakchar oka ko metay kana ? |Santali lakchar oka lekate adoy kana?

মানমিকোআঃ দিনৗম, দিন জিয়ন খাঁড়াওরে নায়তে নাপায়তে তাঁহেন লাগিদ যাহা নেয় নেমাচার নেয়াম ধরম তেয়ার যংআ অনাগে লাকচার’ক মেতাঃ-আ । লাকচার’দ অনা সম্পদকানা যাঁহা আকিল দুদ পৌতয়ৌও বাড়হি বেপার অৗন আরি সেরােআ আর’হঁ আয়মা জিনিস’ক লাগিদ মেনাঃ-আ, নােআ কদ মানমিয়াঃ মিদ সওহেদিয়ৌ সঁওহেদকানা। মানমি’দ মিদ হাহাড়াঃ জিয়ৌলিকানা’ক, অনা খাতির উনকু’দ লায় -লাকচাররেন সিব কোআঃ বানু-আ। অনাতে লৌয় গানঃ-আ যে লায় -লাকচার’দ মানমি তালা খনগে তেয়ার আকানা। সানতাড়’দ আতু বেনাওকাতে এনতে সাঁওতা সিরজৌওকাতে তাঁহেন হড় কানা’ক। বিদতে বঁগা বুরু’ক দেবাসেবা আকোআঃ। অনাতে সানতাড় লায়-লাকচার নাপায়তে মেনাঃ-আ মেনতে বাড়ায় ঞামঃকানা৷ মেনখান সানতাড় তালরে বাহের হড়ক সড় বলয় এনখান উনকু তালারে আডি লেকান এটকেটড়ে সিরজৌওএনা। অনাতে মিদ জায়গা খন আর মিদ জায়গাতেক পাসনাওএনা। ইনৌ বেগর আর’হঁ আডি কারতে’হঁ আকোআঃ লায়-লাকচার বৌয় বৌয়তে আদ চাবাঃকানা। অনা কারন কদ হুয়ু কানা 

 

ক) বাইরি’ক সালাঃ তাপাম তুপুদ : সানতাড়’ক তালারে বাইরি’ক সড় হেজেন খান আডি লেকান এটকেটডে সিরজৌওএনা। অনাতে উনকু সালাঃ তাপাম তুপুদ’দ হুয়লেনা। অনা খাতির মিদ জায়গা খন সানতাড়’ক এটাঃ এটাঃ জায়গাতেক পাসনাওএন খাতির লায়-লাকচার আরিচালি চেতানরেহঁ অরসং পাড়াওএনা, মিদ জায়গা বাগিকাতে যেলেকা এটাঃ জায়গাতেক পাসনাওএনা অনাতে বৗয় বৗয়তে নাওয়া নাওয়া লাকচার’হঁ সিরজৗওএনা।

 (খ) আকাল :- আকাল কারণতেঁহ সানতাড় সঁওতারেয়াঃ লায় লাকচার চেতানরে অরসং পাড়াওলেনা। আকাল হুয়লেনতে জম ঞুরেনাঃ অভাব হুয় খাতির মিদ জায়গা খন আর মিদ জায়গা মানমিক ঞিরলেনা। অনাতে লায়-লাকচারক হিড়িঞ সাগিঞলেদা।

 (গ) মিশনারীকোআঃ অরসং - বিলৗত দিশম খন মিশনারি সাহেব ইশৗয় ধরম পাসনাও লাগিদ সানতাড় তালারে’ক সড় বললেনা। আডি সানতাড় ইশৗয় ধরম’ক আপনারআনা। উনকু সানতাড়’দ ইশৗয় সাহেব লেকাগে হরঃ বাঁদে লায়-লাকচার’ক এহবানা, আকোআঃদক হিড়িঞ সাগিঞকেদা। অনা লেকাতে সনাতাড়াঃ লায়-লাকচার’হঁ আদ ইদিঃকানা।

 

(ঘ) হিন্দুকোআঃ অরসং :- সানতাড় পাড়া পুড়সি দিকু হিন্দু’ক সাঁও আডি দিন ধুরয়ৗ সুর সুপুররে তাঁহেকান খাতির লাকচার অরসংএন। উমকুরেন বঁগা বুরু’ক আপনার আনা। আকোআঃদক হিড়িঞ সাগিঞকেদা। অনা’ক কারনতেঁহ সানতাড় আকোআঃ লায়-লাকচারদক হিড়িঞেদা।

 

(ঙ) এটাঃ পারসিতে অলঃপাড়হাও ;- এটাঃ পারসিতে অলঃ পাড়াহাও খাতির সানতাড় আকোআঃ লায়-লাকচার’ক হিড়িঞ আদ সারিএদা। চেদাঃ সে পারসিতেগে লায়-লাকচার দয় সাব দহয়া। পারসি হিড়িঞঃ খান লাকচারে’হঁ হিড়িঞঃ-আ সাঁওতে সাঁওহেদ-হঁ হিড়িঞ-আ। সানতাড় এটাঃ পারসি সাঁওহেদ’ক আপনারএদ খান নিজেরাঃ’দ হিড়িঞ সাগিঞঃ কানা।

 (চ) রাজআরি কারন :- নেতার ঞেলঃকানা রাজআরি কারনতে সানতাড় সাঁওতা তালারে আডি লেকান বাড়িজ অরসং পাড়াও আকানা। যেলেকা-পারসি সাঁওহেদ চেতানরে অরসং ঞুর আকানা, অনকাগে রাজআরি কারনতে’হঁ পনত’ক হাটিঞেনা আর আয়মা লেকান লায়-লাকচার পারসি সাঁওহেদ চেতানরে সানতাড়’ক হাপাটিঞেনা। অনা খাতির সানতাড়’দ

  উনকুআঃ পারসি সাঁওহেদতেক  অরসংএনা। অনাতে আকোআঃ লাকচার’দ আদ ইদিয়েনা।

(ছ) নাওয়া নাওয়া খাদান কারখানা কামি সানতাড়’ক তালা বলয়েন খাতির : নাওআ নাওআ কারখানা কামি বলয়েন খান চেতান ধাপরেন হড়ক লেকাগে হরঃ বাঁদে’ক কুরুমুটুলেদা। উইহৗর ভাবনা’ই বদল ইদিএনা। চেতান ধাপরেন হড়ক লেকাগে লায়-লাকচার’ক এতহবকেদা। অনা বেগর আদমকদ খাদান কামিরেক রডজ কচলনেন খাতির লাকচার চেতানরেহঁ অরসং পাড়াওলেনা। উনরে বৗয় বৗয়তে আকোআঃ লাকচার’দ আদঃ ডাহারতে মহডায়েনা।

নিয়ৌ’ক কারন বেগর’হঁ সঁওতারেয়াঃ লায়-লাকচার আডি সেদতে মালট ইদিঃকানা। নােআ টেকাও দারামরেনাঃ মিদটাংগে ডাহার মেনাঃ-আ অনা’দ জানাম পারসিতে অলঃ পাড়হাও সেঁড়া কাতেদ সাঁওতা লৗয়তে চেঘাঁও।

কুসুমডুংরী কারাম পরব বাখারা পাড়হাও মে